Pjesëtarët e Policisë të cilët janë të thirrur për të ofruar rend dhe siguri dhe e kanë detyrim denoncimin e rasteve të ndryshme, kurdo dhe kudo që ata janë prezentë, jo rrallëherë futen edhe vet në telashe. Një rast i tillë dyshohet se ka ndodhur të hënën, në rrugën “Ganimete Tërbeshi” në Gjakovë, ku një punonjës i Policisë bashkë me djalin e tij janë përfshirë në një rrahje, raporton ekskluzivisht Gazeta Sinjali.
Burimet brenda Prokurorisë kanë bërë me dije se bëhet fjalë për një pjesëtar të stafit civil në Drejtorinë e Policisë Kufitare dhe është ndaluar nën dyshimin se ka kryer veprën penale “Lëndim i lehtë trupor”.
Sipas informacioneve që posedon Sinjali, i dyshuari bashkë me djalin e tij, kanë sulmuar fizikisht dy persona, po ashtu babë e bir, pas një mosmarrëveshje që kanë pasur me njëri-tjetrin dhe eskaloi në dhunë.
Për pasojë, punonjësi policor dhe djali i tij kanë përfunduar në prangat e Policisë, ndërsa dy viktimat janë dërguar në spital për të marrë trajtimin e nevojshëm mjekësor, si pasojë e lëndime që kanë pësuar.
Për shkak të dyshimeve të ngritura dhe dëshmive që janë mbledhur dhe provojnë përfshirjen e tij në këtë rast, Prokurori i Shtetit ka lëshuar urdhër për ndalimin e dy të dyshuarve.
Gjatë kësaj periudhe, i dyshuari është suspenduar për 48 orë nga Drejtoria e Policisë Kufitare, me rekomandim të Inspektorati Policor të Kosovës.
Rasti është konfirmuar për Sinjalin edhe nga Drejtoria e Policisë Kufitare, si dhe nga Policia Rajonale në Gjakovë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata