Prokuroria Themelore në Prishtinë, ka paraqitur kërkesë për caktimin e masës së paraburgimit ndaj M.Z., i cili po dyshohet për kryerjen e veprave penale “Kanosja” dhe “Nxitja e përçarjes dhe mos durimit “, raporton Gazeta Sinjali.
I dyshuari që u arrestua para disa ditësh dyshohet për kanosje dhe urrejtje ndaj komunitetit LGBTQ+.
Sipas njoftimit, i dyshuari është ndaluar me urdhër të Prokurorit të Shtetit, nën dyshimet se “më 29.10.2023, me dashje e me qëllim të frikësimit e ka kanosur seriozisht personin e dëmtuar, në atë mënyrë që derisa ka qenë duke e drejtuar veturën me shpejtësi të madhe ka tentuar ta godasë në vendkalimin për këmbësorë, por fatmirësisht personi i dëmtuar ka arritur t’i shmanget goditjes nga vetura, derisa me këtë veprim i ka shkaktuar shqetësim të madh, ankth e frikë për jetën.”
Po ashtu, në ditën e njëjtë, i njëjti po dyshohet se “me dashje ka nxitur dhe përhapur publikisht urrejtje, përçarje dhe mos durim ndaj komunitetit LGBTQ+ bazuar në orientimin seksual të personit të dëmtuar, ku përmes rrjetit social “facebook”, komenton në njërin portal për të, çka me këtë seriozisht e ka rrezikuar prishjen e rendit publik, duke nxitur dhe përhapur publikisht urrejtje për komunitetin LGBTQ+ në territorin e Republikës së Kosovës.”