Policia e Kosovës ka arrestuar edhe dy persona lidhur me rastin “Karaçeva”, si të dyshuar për kontrabandim me mallra.
“Në vazhdën e veprimeve operative të grupit hetimor në lidhje me rastin e njohur si “Karaçeva” hetuesit policorë të Drejtorisë për Hetimin e Krimeve Ekonomike dhe Korrupsionit të Policisë së Kosovës sot më 23.09.2020, kanë arrestuar dy persona të dyshuar të cilët në ditën e realizimit të operacionit policor nuk janë gjetur në shtëpitë e tyre”, thuhet në komunikatën e policisë.
Të dyshuarit janë arrestuar nën dyshimet se në vazhdimësi gjatë periudhës kohore 2019-2020 kanë kryer veprën penale “kontrabandimin i mallrave” nga territori i Republikës së Serbisë në territorin e Republikës së Kosovës, ku si pasojë i kanë shkaktuar dëme të mëdha buxhetit të shtetit.
Pas intervistimit, prokurori ka shqiptuar masën e ndalimit prej 48 orësh, për procedura të mëtejme ligjore.
Gazeta Sinjali ka raportuar ekskluzivisht për mega-aksionin në Karaçevë, ku u arrestuan 12 zyrtarë policorë.