Gazeta Sinjali pak më parë raportoi për një aksident të rëndë që ka ndodhur mëngjesin e sotëm në rrugën ‘Agim Ramadani’ në Prishtinë, ku një veturë ka goditur një këmbësore në vendkalimin për këmbësorë.
Zëdhënësja e Policisë së Kosovës për Rajonin e Prishtinës, Florie Ahmeti, tha për Sinjalin se viktima është dërguar për tretman mjekësor.
“Rreth orës 08:30 kemi pranuar informatën se në rrugën “Agim Ramadani” në Prishtinë, ka ndodhur një aksident trafiku me lëndime. Në këtë aksident kanë qenë të përfshirë, një këmbësore dhe një automjet. Si pasojë e aksidentit lëndime trupore ka pësuar këmbësorja dhe e njëjta është dërguar për tretman mjekësor. Me rastin po merret njësiti i trafikut”, tha Ahmeti.
Ndërkohë sinjalizuesit e Gazetës Sinjali kanë dërguar pamje nga vendi i ngjarjes, ku shihet se viktima ka mbetur e shtrirë në rrugë, ndërsa qytetarët janë afruar t’i ofrojnë ndihmë.
