Zhvillimi i shpejtë i inteligjencës artificiale (AI) po nxit rritjen ekonomike në Shtetet e Bashkuara, por njëkohësisht po e zgjeron dallimin mes të pasurve dhe të varfërve, paralajmërojnë ekspertët.
Sipas një analize të publikuar nga CNN, investimet miliardëshe në industrinë e AI-së kanë krijuar një shtresë të re punonjësish dhe investitorësh me të ardhura shumë të larta, ndërsa shumë familje me të ardhura të ulëta dhe të mesme vazhdojnë të përballen me rritjen e kostos së jetesës.
San Francisko shihet si shembulli më i qartë i këtij fenomeni. Ndërsa kompanitë e mëdha të inteligjencës artificiale tërheqin miliarda dollarë investime dhe paguajnë paga të larta, çmimet e banesave dhe qiratë janë rritur ndjeshëm. Në të njëjtën kohë, në një qendër komunitare të qytetit, mbi 200 persona ndodhen në listën e pritjes për ndihma ushqimore.
Ekonomia amerikane u rrit me 2.1 për qind në tre muajt e parë të vitit, kryesisht falë investimeve në AI. Megjithatë, besimi i konsumatorëve mbetet i ulët, ndërsa punëtorët me të ardhurat më të ulëta kanë regjistruar rritjen më të dobët të pagave.
Ekspertët thonë se përfituesit kryesorë janë themeluesit e kompanive të inteligjencës artificiale, investitorët e hershëm dhe punonjësit e sektorit të teknologjisë, ndërsa të rinjtë që kërkojnë punë, familjet me të ardhura të ulëta dhe punonjësit e industrive kreative po e ndiejnë më shumë presionin ekonomik.
Sipas ekonomistëve, nëse përjashtohen investimet në inteligjencën artificiale, investimet e bizneseve në sektorët tradicionalë do të ishin në rënie, duke treguar se zhvillimi i AI-së po mbështet ekonominë, por njëkohësisht po krijon një model ku përfitimet përqendrohen te një numër i vogël njerëzish.
Sinjali – aty ku e vërteta flet para lajmit!