Kryetari i Komunës së Prishtinës, Shpend Ahmeti, ka folur për rritjen e numrit me koronavirus, teksa tha se situata është nën kontroll dhe nuk është e nevojshme të ndërmerren masa të tjera.

Ahmeti tha se në menaxhimin e situatës më së shumti po kontribuojnë qytetarët.

“Nuk besoj se do të ketë lëvizje më shumë se ditëve të kaluara. Ju e dini se Qeveria ka vendosur që t’i largojë të gjitha masat të cilat janë në fuqi, përveç tubimeve të mëdha, ku mund të ketë më shumë se 50 persona në distancë të vogël dhe ne ende ju themi se mbrojtja më e mirë ndaj virusit është distanca dhe dorëzat që IKShP-ja thotë se është masë mbrojtëse”, tha Ahmeti.

Ndryshe, Ahmeti kërkon nga qytetarët të kenë kujdes të shtuar për shkak se në rihapjen e bizneseve mund të ketë rritje të numrit të rasteve me koronavirus.

“Nuk besoj, ne kemi pasur diskutime edhe në Ministrinë e Shëndetësisë dhe IKShP, ata janë institucione që vendosin. Unë nuk mendoj se do të ketë ripërsëritje të masave përveç se na humb kontrolli total. Pas rihapjes në valën e tretë, natyrisht se priten që të ketë një numër më të madh të rasteve por lajm i mirë është se nuk kemi raste të rënda dhe nuk fatalitete nga kjo pandemi. Besoj se situata është nën kontroll dhe për këtë po kontribuojnë qytetarët më së shumti”, tha ai për EO. /Gazeta Sinjali/.