Të hënën në mbrëmje është sulmuar me armë zjarri një person derisa ishte duke lëvizur me veturën e tij në fshatin Voksh të Deçanit. Personat e dyshuar ia zunë pritën pas orës 21:00, duke gjuajtur disa herë me armë, por fatmirësisht nuk arritën ta qëllonin. Lidhur me rastin tashmë kanë nisur hetimet nga Policia, raporton Gazeta Sinjali.
Sinjali ka mësuar se i riu që u tentua të vritej është G. Dukaj, rreth 41-vjeçar, i cili kërkoi ndihmën e Policisë.
Viktima ka dhënë dëshmi para hetuesve policorë lidhur me rastin, por që akoma nuk është zbuluar se cili mund të jetë motivi i incidentit.
Sipas informacioneve të para, ndonëse kanë nisur hetimet, akoma nuk është identifikuar personi i dyshuar.
Lajmin e ka konfirmuar për Sinjalin edhe zëdhënësi i Policisë Rajonale në Pejë, Driton Rugova, i cili bëri të ditur se nuk ka persona të lënduar, por vetëm dëme materiale.
“Me datë 13.05.2024 rreth orës 21:20, Policia është informuar nga viktima se ne rrugën Deçan-Junik në fshatin Voksh, deri sa ishte duke qarkulluar në këtë rrugë i njëjti nga person/a, të panjohur është gjuajtur me armë zjarri në drejtim të tij, në veturën e viktimës, janë shkaktuar dëme por fatmirësisht nuk ka pasur persona të lënduar. Me urdhër të Prokurorit të shtetit rasti cilësohet Vrasje në tentativë”.
Gazeta Sinjali do të iu mbajë informuar me detajet e reja.