Xhemajl Shala, Sadik Shala, Iskender Sale dhe Alban Gashi të akuzuar për shitblerje të narkotikëve dhe vepra tjera u dënuan me 26 vite burgim dhe 65 mijë euro gjobë.
Aktgjykimi në fjalë, u shpall të martën nga kryetarja e trupit gjykues, gjykatësja Valbona Musliu-Selimaj.
Sipas këtij aktgjykimi, fillimisht i akuzuari Xhemajl Shala dhe Iskender Sale për veprën penale “Pjesëmarrja ose organizimi i grupit kriminal të organizuar” lidhur me veprën penale “blerja, posedimi, shpërndarja e paautorizuar e narkotikëve dhe substancave psikotrope dhe analoge”, secili veç e veç u dënuan me nga 8 vite e 6 muaj burgim dhe 25 mijë euro gjobë.
Ndërsa të njëjtit për veprën penale “Legalizimi i përmbajtjes së rreme” u dënuan me nga 1 vit burgim.
Mirëpo, ndaj tyre u shqiptua dënimi unik për secilin veç e veç nga 9 vite burgim në të cilin dënim do tiu llogaritet edhe koha e kaluar në paraburgim dhe 25 mijë euro gjobë.
Kurse, ndaj të akuzuarit Sadik Shala për veprën penale “pjesëmarrja ose organizimi i grupit kriminal të organizuar” lidhur me veprën penale “blerja, posedimi, shpërndarja e paautorizuar e narkotikëve dhe substancave psikotrope dhe analoge” u shqiptua dënim me burgim në kohëzgjatje prej 7 vite në të cilin dënim do ti llogaritet edhe koha e kaluar në paraburgim dhe 15 mijë euro gjobë.
I akuzuari Alban Gashi për veprën penale “dhënia e ndihmës kryerësve pas kryerjes së veprave penale” u dënua me 1 vit burgim ndërsa për veprën penale “legalizim i përmbajtjes së rreme” në mungesë të provave i njëjti u lirua nga akuza.
Ndryshe, i akuzuar në këtë rast ka qenë edhe Labinot Zenelaj, mirëpo, ndaj tij gjykata kishte bërë veçimin e procedurës penale, pasi i njëjti e kishte pranuar fajësinë dhe më 10 mars 2021, ishte dënuar me një vit burgim me kusht dhe 5 mijë euro gjobë për veprën penale të mashtrimit, raporton Betimi për Drejtësi.