Ura përballë Lidhjes së Prizrenit në Prizren që disa javë është pa rrethoja, gjendje kjo që po rrezikon jashtëzakonisht shumë këmbësorët, por edhe veturat. Heqja e mbrojtësve për ta rinovuar këtë urë dita ditës po e rritë rrezikun dhe ende nuk është bërë rregullimi i saj.
Qytetarët që kalojnë kah ajo pjesë, që frekuentohet në masë të madhe, për shkak se ndodhet në qendër kanë thënë për Sinjalin se rreziku më i madh është gjatë natës. Ata kanë dërguar edhe pamje ku shihen disa shiritë që janë vendosur rreth urës, por jo edhe ndonjë mbrojtëse që e parandalon rrezikun.
Në këtë urë, që pa një pa dy mund ta thyeni qafën, qytetarët shpresojnë që sa më shpejt do të bëhen rregullimet e nevojshme para se të ndodhë ndonjë rast fatal.
Ata thonë se në këtë gjendje që ndodhet ura nuk kanë siguri as fëmijët t’i lënë vet, duke marrë parasysh edhe shpejtësinë e veturave që lëvizin në atë pjesë.
Gazeta Sinjali ka tentuar të marrë një përgjigje edhe nga kryetari i Prizrenit, Shaqir Totaj, por i njëjti nuk është përgjigjur në thirrjet e Sinjalit.