Presidenti i Shteteve të Bashkuara, Donald Trump, e ka shkarkuar inspektorin e përgjithshëm të inteligjencës, Michael Atkinson, pasi kishte ndikuar në nisjen e hetimeve kundër presidentit.

Ky vendim është kritikuar ashpër nga Partia Demokratike, transmeton Gazeta Sinjali.

Në kohën kur vendi po kalon nëpër krizën e koronavirusit, presidenti amerikan e zgjodhi mbrëmjen e së premtes për t’i njoftuar anëtarët e Dhomës së Përfaqësuesve dhe ata të komisioneve për inteligjencë në Senat në lidhje me shkarkimin e kryeinspektorit.

Në letrën që presidenti ua dërgoi këtyre institucioneve thuhet se është jetike që ai të ketë besim në personin që shërben si inspektor i përgjithshëm dhe se kjo nuk qëndron më në rastin e personit të shkarkuar.

Aty gjithashtu thuhet se presidenti në ditët e ardhshme do të nominojë një individ në të cilin ka besim për këtë post, shkruan “The Guardian”.

“Michael Atkinson-i është njeri me integritet, i cili i ka shërbyer kombit tonë për gati dy dekada. Fakti se është shkarkuar shkaku i guximit që e ka pasur për t’ia thënë të vërtetën pushtetit e bën atë patriot”, tha Chuck Schumer, udhëheqës i demokratëve në Senat.

Ndryshe, Atkinson- ishte zyrtari i parë që e kishte njoftuar Kongresin vitin e kaluar në lidhje me ankesën e një sinjalizuesi për telefonatën e presidentit Trump me homologun ukrainas, ku i kërkonte fillim të hetimeve kundër rivalit politik, Joe Biden/Gazeta Sinjali/