Lokalet e natës të cilat frekuentohen për t’u argëtuar me muzikë, shpesh herë shndërrohen edhe në ring boksi. Nuk janë të rralla rastet kur të rinjtë që dalin të shijojnë jetën e natës, përfundojnë në telashe pasi përfshihen në përleshje fizike, raporton Gazeta Sinjali.
Një rast i tillë ka ndodhur orët e para të mëngjesit të djeshëm, ku në lokalin ‘Lit’ në Prishtinë, katër persona janë përfshirë në një rrahje, ku pos grushteve, u shkrepën edhe armë zjarri.
Sinjali mëson se si pasojë e një mosmarrëveshjeje, të dyshuarit janë përleshur fizikisht mes vete e më pas njëri nga ta ka shtënë me armë zjarri dhe është larguar në drejtim të panjohur.
Policia me të marrë informatën kanë dalë në vendin e ngjarjes, ku gjatë ekzaminimeve kanë gjetur dy gëzhoja që dyshohet se janë të armës që u përdor në rast. Po ashtu si pasojë e të shtënave është dëmtuar një veturë, e cila është konfiskuar për ekzaminim të mëtejmë.
Prokurori i Shtetit ka urdhëruar që ndaj të dyshuarit i cili ndodhet në arrati, të nisin hetimet për veprën penale ‘Vrasje në tentativë’, ndërsa ndaj të dyshuarve tjerë është iniciuar rasti ‘Lëndim i rëndë trupor’.