Pas zhvillimeve të fundit rreth takimit trilateral në Bruksel mes Joseph Borell, kryeministrit Kurti dhe presidentit Vuçiq, ka reaguar edhe kryetari i AAK-së, Ramush Haradinaj.
I pari i AAK-së ka listuar nga një kërkesë për kryeministrin Kurti, presidenten Osmani dhe kryeparlamentarin Konjufca.
Ai i ka bërë thirrje Kryeministrit ta pezullojë zbatimin e vendimit për targat deri në arritjen e marrëveshjes për njohje të ndërsjellë.
Po ashtu ai i ka bërë thirrje Kryetarit të Kuvendit që urgjentisht ta thërras Parlamentin në seancë të jashtëzakonshme, që të miratohet Rezoluta e propozuar prej AAK, për tejkalimin e situatës së krijuar.
Ndërkohë i ka kërkuar presidentes që të marrë rol aktiv në qetësimin e situatës dhe në kapërcimin e ngërçit të krijuar.
Postimi i plotë i tij:
I bëj thirrje Kryeministrit ta pezullojë zbatimin e vendimit për targat deri në arritjen e marrëveshjes për njohje të ndërsjellë.
I bëj thirrje Kryetarit të Kuvendit që urgjentisht ta thërras Parlamentin në seancë të jashtëzakonshme, që të miratohet Rezoluta e propozuar prej AAK, për tejkalimin e situates së krijuar.
Po ashtu i kërkoj Presidentes të marrë rol aktiv në qetësimin e situatës dhe në kapërcimin e ngërçit të krijuar.
I ftoj të gjithë qytetarët serb që të përmbahen nga aktet e dhunës dhe të mos bien pre e kalkulimeve politike të regjimit në Beograd.
Është momenti i fundit që qeveritë në Beograd e në Prishtinë, të ulen e të bien në ujdi për marrëveshjen e paqes për njohje, e të heqin dorë nga veprimet që rrezikojnë jetët e njerëzve!
