image Nxënësit e pranuar në universitete ndërkombëtare i nënshtrohen Testit të Maturës

Arsim

Nxënësit e pranuar në universitete ndërkombëtare i nënshtrohen Testit të Maturës

news image

Ministria e Arsimit dhe Shkencës ka organizuar sot Provimin e Maturës për nxënësit, të cilët janë pranuar në universitetet jashtë Kosovës dhe u janë kërkuar edhe pikët në Testin e Maturës.

Në komunikatën e lëshuar për media thuhet se me vendim të Këshillit Shtetëror të Maturës (KShM), provimi është mbajtur për 103 nxënës të paraqitur për të hyrë në Testin e Maturës, e që si dëshmi e kanë pasur dokumentin e pranimit në universitete ndërkombëtare.

Testimi i këtyre maturantëve është organizuar në dy qendra: në shkollën “Xhevdet Doda” në Prishtinë, ku janë testuar 61 nxënës nga disa rajone të Kosovës dhe në shkollën “Gjon Buzuku” në Prizren, ku testit i janë nënshtruar 42 maturantë nga kjo komunë.

Provimi i Maturës për këta nxënës ka shkuar sipas planifikimit dhe duke i respektuar të gjitha masat e rekomanduara nga IKShP dhe MSh për mbrojtje nga virusi COVID-19.

Rezultatet për nxënësit e testuar sot do të bëhen publike të hënën, 13 korrik 2020./Gazeta Sinjali/