Presidenti i Serbisë, Aleksandar Vuçiq, nga nesër do të zhvillojë një vizitë dyditore në Itali, gjatë së cilës do të takohet me ministrin e Jashtëm të atij vendi, Antonio Tajani, si dhe me kryeministrat e Maqedonisë së Veriut dhe Shqipërisë, Dimitar Kovaçevski dhe Edi Rama.
Siç njoftoi Presidenca e Serbisë, Vuçiq do të takohet me kryeministrat e Maqedonisë së Veriut dhe Shqipërisë në kuadër të nismës “Ballkani i Hapur”.
Ata do të vizitojnë Panairin Ndërkombëtar të Verës VINITALY 2023 në Verona dhe së bashku me Ministrin e Punëve të Jashtme të Italisë do të vizitojnë një stendë të përbashkët ku prodhues nga Serbia, Maqedonia e Veriut dhe Shqipëria do të ekspozojnë verërat.
Kujtojmë se në kuadër të nismës ‘Ballkani i Hapur’, Shqipëria, Serbia dhe Maqedonia e Veriut kanë arritur një sërë marrëveshjesh, që thuhet se kanë për qëllim përmirësimin e bashkëpunimit rajonal.
Marrëveshjet, mes tjerash, përfshijnë lëvizjen e qytetarëve të tyre me letërnjoftime, bashkëpunim në lehtësimin e importit dhe eksportit të mallrave, si dhe një memorandum mirëkuptimi dhe bashkëpunimi për qasje të lirë në tregun e punës.
Tre nismëtarët e “Ballkanit të Hapur”, kryeministri i Shqipërisë, Edi Rama, presidenti i Serbisë, Aleksandar Vuçiq, dhe ish-kryeministri i Maqedonisë së Veriut, Zoran Zaev, e kanë ideuar këtë koncept në vitin 2019 me qëllim të, siç është thënë, krijimit të një zone të lëvizjes së lirë të njerëzve, mallrave dhe shërbimeve në Ballkanin Perëndimor.