Delegatët e Lidhjes Demokratike të Kosovës përmes Kuvendit Zgjedhor të kësaj partie e kanë zgjedhur sot Lumir Abdixhikun, kryetar të ri të këtij subjekti politik, shkruan Gazeta Sinjali.

Abdixhiku ka arritur të marrë 190 vota nga 329 delegatë sa kanë votuar, duke fituar kështu qysh në raundin e parë të votimeve.

Abdixhiku kishte kundërkandidat, nënkryetarin e LDK-së, Lutfi Hazirin, që numëron disa dekada si pjesë e LDK-së, si dhe ministrin në detyrë të Bujqësisë, Besian Mustafa, djali i veprimtarit të vrarë të LDK-së, Xhemajl Mustafa.

Lumir Abdixhiku ka lindur më 22 prill 1983. Abdixhiku përfundoi studimet universitare në Universitetin e Prishtinës.

Abdixhiku mori gradën Master i Shkencave në vitin 2006 nga Universiteti Staffordshire në Britani, në fushën e Moralit Fiskal.

Në vitin 2013 ai mori Doktoraturën e tij në Ekonomi nga Universiteti Staffordshire pas katër vjet kërkimesh dhe hulumtimesh në fushën e përcaktuesve të evazionit të taksave të biznesit në vendet në tranzicion.

Abdixhiku është gjithashtu Drejtori Ekzekutiv i Institutit Riinvest. Ai u bashkua me Institutin në 2005 dhe që atëherë ka qenë i përfshirë në disa projekte kërkimore, avokuese dhe zhvillimore – në Kosovë dhe jashtë saj.

Ai ishte ministër i Infrastrukturës dhe Mjedisit nën Qeverinë Kurti. Para kësaj, Abdixhiku ishte Kryetar i Komisionit për Buxhet dhe Financa në Kuvendin e Republikës së Kosovës në vitin 2017-2019.

Në zgjedhjet e vitit 2019, Abdixhiku ishte politikani i 9-të më i votuar në Kosovë dhe filloi mandatin e tij të dytë si deputet i Kuvendit të Kosovës.

Aktualisht ai është anëtar i Kryesisë në Lidhjen Demokratike të Kosovës./Gazeta Sinjali/