Deputeti nga radhët e Aleancës për Ardhmërinë e Kosovës, Pal Lekaj, ka kritikuar Qeverinë Kurti dhe ka thënë se Lëvizja Vetëvendosje do të dështojë në zgjedhjet lokale.
“Ju do të dështoni sepse qytetari e ka parë sa keq qeverisni, e keni shembull Prizrenin, Prishtinën, Mitrovicën. Në këto zgjedhje do të dështoni sepse qytetari e ka parë se sa keq udhëheqni në këto komuna”, ka deklaruar Lekaj.
Ai ka thënë se në rishikimin e buxhetit nuk janë marrë për bazë nevojat e qytetarëve të Kosovës.
Gjithashtu, deputeti Lekaj e ka cilësuar si jo të barabartë këtë rishikim.
“Ju deklaronit se me ardhjen e juaj në pushtet, kjo praktikë kinse do të marrë fund. Qytetarët e Kosovës janë të barabartë. Ky rishikim mundet të jetë gjithçka por jo i barabartë, e keni krijuar me qëllim që të përfitoni politikisht. Nuk keni marrë bazë nevojat e qytetarëve tanë, por aty ku përfitoni më shumë vota. Kjo është e padrejtë sepse po dëmtoni qytetarët e Kosovës”, ka thënë tutje Lekaj.
