Një sulm ndaj zyrtarëve policorë është raportuar të ketë ndodhur mbrëmë para mesnatës në Fushë Kosovë, raporton Gazeta Sinjali.
Siç njofton Policia, një burrë dhe dy femra nga Shqipëria i kanë sulmuar dy zyrtarët policorë në detyrë.
Zëdhënësi i Policisë, Bajram Krasniqi i ka thënë Sinjalit se dhuna ka filluar pasi sulmuesi nuk ka qenë duke mbajtur maskë dhe ka refuzuar ta vendoste.
Ndërkaq në raportin e Policisë thuhet se burri nga Shqipëria është dërguar në mbajtje për 48 orë.
“Fushë Kosovë 20.08.2020-22:45. Janë arrestuar tre të dyshuar, një mashkull dhe dy femra që të tre shtetas të Shqipërisë, pasi kanë sulmuar dy zyrtarë policor derisa kanë qenë në kryerje të detyrës zyrtare – zbatim të vendimit të Qeverisë së RKS-së lidhur me pandeminë. Si pasojë, dy zyrtarët policorë kanë pësuar lëndime trupore dhe kanë pranuar tretman mjekësor. Poashtu tretman mjekësor i është ofruar edhe të dyshuarve. Me vendim të prokurorit i dyshuari mashkull është dërguar në mbajtje për 48 orë”, thuhet në raportin 24 orësh.
Të dyshuarat femra që ishin përfshirë në këtë përleshje fizike janë liruar në procedurë të rregullt. /Gazeta Sinjali