Ministri i Mbrojtjes, Armend Mehaj ka njoftuar se personeli ushtarak dhe civil i ministrisë që ai drejton, është i vaksinuar 100 për qind. Ndërkaq ai i Forcave të Sigurisë së Kosovës 99 përqind.

Ai këtë e bëri të ditur përmes një postimi në Facebook, ku tha se ky proces është realizuar me sukses të plotë.

“Ky proces është realizuar me sukses të plotë, nisur nga përgjegjshmëria e lartë institucionale për shëndetin e zyrtarëve dhe ushtarakëve tanë; Nga parimi ushtarak “Udhëheq dhe vepro me shembull”; Nga përgjegjësia kushtetuese e ligjore që kemi ndaj vendit dhe qytetarëve tanë, me qëllim të realizimit sa më të suksesshëm të reagimit dhe mbështetjes direkte për qytetarët tanë ndaj virusit Corona, këtij armiku të rrezikshëm e të paparashikueshëm, si dhe me qëllim të përmbushjes sa më të suksesshme të misionit të mbështetjes ushtarake të autoriteteve civile”, ka shkruar Mehaj.

“Të gjithëve ju uroj shëndet të plotë dhe vazhdojmë me detyrat tona në shërbim të vendit dhe qytetarëve tanë! Kurse, ju qytetarë të dashur, përkundër që numri i rasteve ka rënë, mos harroni të mbani maskat, respektoni distancën dhe mbani higjienën!”, ka vazhduar Mehaj. /GazetaSinjali/