Gazeta Sinjali sot gjatë ditës raportoi për një rast të rëndë që ka ndodhur në qytetin e Gjakovës, ku një grua u sulmua brutalisht nga i dashuri i saj. Personi që dyshohet se i shkaktoi lëndime të rënda trupore 38-vjeçares tashmë është arrestuar dhe është ndaluar nga Prokuroria.
Burimet e Gazetës Sinjali bëjnë me dije se bëhet fjalë për Sami Thaqin, 35-vjeçar, i cili dyshohet se rrahu keq të dashurën e tij, duke i thyer hundën.
Thaqi madje dyshohet se viktimën e ka marrë dhe e ka dërguar në një fshat të Rahovecit, ku më pas e ka lënë në mes të rrugës.
E tmerruar për atë që i ndodhi, viktima arriti ta njoftojë Policinë, me ç’rast njësitet policore arritën në vendin e ngjarjes.
Pas denoncimit 35-vjeçari është arrestuar dhe ndaj tij kanë nisur hetimet nën dyshimet për kryerjen e veprës penale ‘Lëndim i rëndë trupor’.
Me urdhër të prokurorit, Thaqi është ndaluar për 48 orë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.