E lindur në qytetin e Mitrovicës, juriste e diplomuar në Prishtinë, me master e doktoraturë të kryer në Pitsburg të SHBA-ve, bursiste në të gjitha fazat e studimeve, profesoreshë në Universitetin e Prishtinës, ligjëruese në Amerikë, deputete e Kuvendit të Kosovës për tri mandate. Gruaja më e votuar në historinë e Kosovës në dy palë zgjedhjet e fundit. Kjo është Vjosa Osmani e cila do t’i prijë listës zgjedhore të LDK-së, praktikisht edhe si kandidate për kryeministre të ardhshme nga kjo parti.

Lidhja Demokratike e Kosovës, më në fund dha lajmin e shumëpritur, duke zyrtarizuar kandidatin për kryeministër. Pas shumë diskutimeve e presioneve publike partia e Isa Mustafës shuajti kurreshtjen e të gjithëve, përfshirë edhe të kundërshtarëve politikë. Me konsensus të plotë brenda kryesisë së LDK-së, u vendos që kandidate për kryeministre të jetë ish deputetja, Vjosa Osmani.

Me një karrierë e akademike dhe politike, me një popullaritet në rritje, Vjosa Osmani, arriti që ta marr besimin e kryesisë së LDK-së për kandidatë për kryeministre.

Gruaja më e votuar në Kosovë nesër pritet që të votohet edhe zyrtarisht në Këshillin e Përgjithshëm të Lidhjes Demokratike të Kosovës, si kandidate e kësaj partie për kryeministre të ardhshme të vendit.

Por kush është Vjosa Osmani:

Vjosa Osmani – Sadriu u lind më 17 maj të vitit 1982, në qytetin e Mitrovicës. Shkollën fillore dhe atë të mesme, e përfundoi me sukses të shkëlqyeshëm në qytetin e saj të lindjes. Studimet themelore i përfundoi në Fakultetin Juridik të Universitetit të Prishtinës, ndërsa studimet master dhe doktoraturën e përfundoi në Universitetin e Pitsburgut, në SHBA, ku u dallua në mesin e qindra studentëve ndërkombëtarë. Përgjatë të gjitha fazave të studimit, ajo ishte bursiste. Si profesoreshë universiteti, në Kosovë ajo ligjëron lëndë nga fusha e së Drejtës Ndërkombëtare, ndërkaq në Amerikë ligjëron lëndën “Shtet-ndërtimi dhe e Drejta: Përvoja e Kosovës”.

Deri para pak ditësh Osmani ishte kryetare e Komisionit për Punë të Jashtme, Diasporë dhe Investime Strategjike, si deputete e LDK-së. Më herët ka shërbyer si Kryetare e Komisionit për Integrime Evropiane dhe nënkryetare e Komisionit për Reforma Kushtetuese në Kosovë. Krahas ndërtimit të karrierës së suksesshme, Vjosa është martuar dhe është nënë e dy vajzave binjake.

Karriera politike e Vjosa Osmanit filloi qysh në adoleshencë, kur edhe ishte aktiviste e LDK-së, për t’u ngritur më pas ndër vite. Më 27 gusht të vitit 2009, Vjosa Osmani – Sadriu u zgjodh shefe e stafit të Presidentit të atëherëshëm të Republikës së Kosovës, Fatmir Sejdiu. Për tri mandate, Osmani ishte deputete e Kuvendit të Kosovës nga radhët e LDK-së, me ç’rast në dy mandatet e fundit, ishte deputetja grua më e votuar në historinë e Kosovës.

Ndonëse në moshë të re, ajo njihet për kontributin e saj të dhënë për pavarësimin e Kosovës, saktësisht njihet kontributi i saj në Gjykatën Ndërkombëtare të Drejtësisë (GJND), ku në atë kohë ishte pjesë e palës kosovare në mbrojtjen e ligjshmërisë së pavarësisë së Kosovës, rast të cilin Kosova e kishte fituar kundrejt Serbisë. Në këtë proces jetik për pavarësimin e vendit, Vjosa ka shërbyer si përfaqësuese e Kosovës.

Kandidatja për kryeministre të LDK-së Vjosa OSmani, i përfundoi studimet e nivelit bachelor në Kosovë me bursë, e cila iu nda nga Ministria e Arsimit, duke u vlerësuar si studentja më e mirë e Fakultetit Juridik në Kosovë

Njëherësh, ajo u zgjodh edhe një ndër pesë studentët më të mirë të vendit nga të gjitha fakultetet. Në vitin 2004, ajo ishte përfituese e bursës për përfundim të studimeve të nivelit master në Universitetin e Pitsburg-ut në SHBA. Në vitin 2005 është shpërblyer dy herë me Çmimin “Excellence For The Future Award”, nga Universiteti i Pitsburgut. Në vitin 2009, falë suksesit të treguar, kishte fituar përsëri bursë të plotë studimi, për përfundim të studimeve të doktoraturës në të njëjtin universitet, ku u fokusua përsëri në fushën e Juridikut, konkretisht në fushën e së Drejtës Ndërkombëtare. Po ashtu, për kontributin e saj në fushën e të drejtave të njeriut, ajo u vlerësua me Çmimin “Sheth International Achievement Award”, nga Universiteti i Pitsburgut.

Fokusi politik i Osmanit kryesisht ka qenë në luftimin e korrupsionit dhe krimit të organizuar dhe për sigurimin e një juridiksioni të pavarur. Po ashtu, ajo është e fokusuar edhe në politikën e jashtme, veçanërisht në procesin e integrimit Euro-Atlantik të Kosovës dhe në ruajtjen e marrëdhënieve me Shtetet e Bashkuara. Përveç gjuhës amtare, flet edhe anglishten, turqishten, spanjishten dhe serbishten.

Ka publikuar libra, artikuj, monografi dhe punime nga fusha e të Drejtës Ndërkombëtare dhe Komerciale, si në gjuhën shqipe, ashtu edhe në atë angleze. /Gazeta Sinjali/