Gazeta Sinjali raportoi mbrëmë për një incident që ndodhi në mes të disa qytetarëve, në Rakovinë të Gjakovës, për shkak të punimeve që po kryente një kompani në rrugët e fshatit. Përleshja, motivi i së cilës dyshohet të jetë një kontest pronësor, eskaloi në sulm, për çka u desh intervenimi i Policisë.
Një patrullë policore që doli në vendin e ngjarjes arrestoi 39-vjeçarin Gani Kelmendi, i cili po dyshohet për veprat penale “Kanosje” dhe “Asgjësim apo dëmtim i pasurisë”.
Sipas informacioneve të para, i dyshuari e ka dëmtuar kamionin e kompanisë që ishte kontraktuar për t’i kryer punimet, duke e sulmuar me mjete të forta. Përveç dëmeve që i ka shkaktuar në automjet, i dyshuari e ka kërcënuar edhe shoferin e kamionit dhe qytetarët përreth.
Për të mos e lejuar situatën që të përshkallëzohet, dikush e ka njoftuar Policinë, me ç’rast i dyshuari është arrestuar dhe shoqëruar në stacion policor. Pas intervistimit, i njëjti është ndaluar për 48 orë.
Burimet brenda Prokurorisë thonë se kjo nuk është hera e parë që po ndodhin incidente të tilla në këtë fshat dhe krejt kjo po ndodhë për shkak të një kontesti pronësor.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.