Kryeministri i Republikës së Kosovës, Albin Kurti ka thënë se pikën e vetme që do ta diskutojnë në mbledhjen e sotme të qeverisë është për masat parandaluese ndaj koronavirusit.

Këtë i pari i vendit e ka bërë të ditur përmes një shkrimi të publikuar në rrjetin social Facebook, transmeton Gazeta Sinjali.

“Sonte, në ora 20:00, Qeveria e Republikës së Kosovës mban mbledhje të jashtëzakonshme, me të vetmen pikë diskutimi: Shqyrtimi i propozim-vendimit për masat parandaluese në funksion të mbrojtjes nga Coronavirus Covid-19”, ka shkruar ai në Facebook.

Gazeta Sinjali më herët raportoi që pika e vetme që do të diskutohet në këtë mbledhje është për masat parandaluese ndaj koronavirusit.

Qeveria e Kosovës gjatë ditës së djeshme ka ndarë mbi 10 milionë euro për nevojat e zbatimit të Planit të Veprimit për zbatimin e Planit të Gatishmërisë dhe të Reagimit kundër Covid-19, të Ministrisë së Shëndetësisë.

Në Kosovë deri më tani nuk është konfirmuar asnjë rast me koronavirus, teksa në Shqipëri është shënuar viktima e parë dhe raportohet se janë të infektuar rreth 16 persona.

Gjatë ditës së sotme, Organizata Botërore e Shëndetësisë e ka shpallur koronavirusin pandemi. /Gazeta Sinjali/