Zënkat e mosmarrëveshjet për prona në vendin tonë janë shumë të shpeshta. Në to zakonisht përfshihen familjarë e fqinj dhe në shumë raste eskalojnë në të shara, kërcënime, sulme fizike e shpesh edhe tragjikisht, raporton Gazeta Sinjali.
Në një përleshje mes vete janë përfshirë mbrëmë edhe dy vëllezër në rrugën ‘Vëllezërit Frashëri’ në Gjilan.
Burimet e Gazetës Sinjali brenda Prokurorisë kanë bërë me dije se gjithçka dyshohet të ketë ndodhur si pasojë e një konflikti për pronë.
Përpos vëllezërve, në rrahje u përfshinë edhe dy djemtë e tyre dhe si rrjedhojë kanë mbetur të lënduar 59 dhe 50-vjeçari.
Të dyshuarit kanë marrë ndihmë mjekësore në spital, ndërkohë që në rast ka intervenuar edhe Policia e Kosovës.
Të dyshuarit janë intervistuar nga hetuesit policorë në stacion dhe ndaj tyre është iniciuar rasti ‘Lëndim i lehtë trupor’.
Pas përfundimit të procedurave policore, Prokurori i Shtetit ka nxjerrë aktvendim që tre të dyshuarve t’u caktohet masa e ndalimit policor, ndërkohë që po vazhdojnë kërkimet për djalin e njërit prej të dyshuarve, pasi që i njëjti menjëherë pas kryerjes së veprës, është larguar në drejtim të panjohur.