Ish kryeministri i vendit, Avdullah Hoti, ka reaguar ndaj Qeverisë Kurti në lidhje me zhvillimin ekonomik të vendit i cili duket se po stagnon duke ngritur shqetësimet për një varfërim të madh të qytetarëve.
Hoti në një postim në Facebook ka përmendur përpjekjet e qeverisë së tij për të nxjerrë ekonominë nga kriza, e të cilat ishin materializuar me anë të disa Pakove të Rimëkëmbjes Ekonomike që kishin rezultuar të suksesshme.
“Që nga atëherë, trendi i rritjes ekonomike është në rënie. Sigurisht shkaktarë janë edhe faktorët e jashtëm, por në politika ekonomike dhe fiskale nuk është ndërmarrë asnjë veprim domethënës”, tha ai.
Sipas tij, Qeveria është mbyllur plotësisht ndaj bizneseve. Nuk është mbajtur asnjë mbledhje e Këshillit Kombëtar për Zhvillim Ekonomik për të diskutuar shqetësimet e bizneseve dhe për të zhvilluar politikat e reja ekonomike.
Ish-kryeministri Hoti ka treguar edhe një grafikon në të cilin shfaqet fillimi i rritjes ekonomike dhe fillimi i rënies së këtij hovi duke rezultuar në vetëm 2,14 për qind në tremujorin e dytë të vitit 2022.