Kryetari i Aleancës për Ardhmërinë e Kosovës, Ramush Haradinaj ka reaguar pas zhvillimeve të fundit lidhur me situatën e krijuar në Veri.
Kreu i AAK-së nëpërmjet një statusi në Facebook, ka shkruar se sulmet e grupeve kriminale ndaj Eulexit dhe Policisë së Kosovës janë goditje mbi paqen dhe stabilitetin në Kosovë e rajon.
Ai i ka bërë thirrje Beogradit që urgjentisht të heqë dorë nga veprimet e tyre destabilizuese dhe luftënxitëse, që sipas tij mund të lë pasoja të paparashikueshme për të dyja vendet, si Kosovën, ashtu edhe Serbinë.
Postimi i plotë i Haradinajt:
Sulmet e grupeve kriminale ndaj Eulex-it dhe Policisë së Kosovës në veri, janë goditje e rëndë mbi paqen dhe stabilitetin jo vetëm në Kosovë por edhe në rajon! Beogradi duhet që urgjentisht të heqë dorë nga veprimet e veta destabilizuese e luftënxitëse me pasoja të paparashikueshme jo vetëm për Kosovën por edhe për Serbinë. Është investuar shumë për paqen dhe askush nuk do të lejohet ta rrezikojë atë.
Sot, është momenti i fundit që regjimi në Beograd t’i thërrasë arsyes dhe ta pranojë realitetin e Kosovës së pavarur dhe sovrane dhe këtë ta pranojë edhe në tavolinën e bisedimeve!
Luftërat në Ballkan janë kapitull i mbyllur!