Sadete Hajrizi e shkolluar për mjekësi, është një “SOS-nënë” që ua kushtojë afër 18 vjet të jetës së saj fëmijëve pa përkujdesje prindërore.
Tani ajo jeton në Prishtinë me pesë fëmijë nga mosha 5 deri në 14 vjeç, që i konsideron familje.
Në moshën 40 vjeçare ajo vendosi të bëhet “SOS-nënë” për t’i rritur fëmijët që kanë mbetur pa përkujdesje prindërore.
Edhe pse nuk ka fëmijë të saj biologjik ajo thotë për REL se, i janë plotësuar të gjitha ëndrrat.
“Unë fëmijë nuk kam, s’kam qenë e martuar, por nuk ndiej asgjë që nuk kam qenë e martuar. Më janë plotësuar të gjitha ato ëndrrat që i kam pasur”, thotë ajo.
Gjatë angazhimit, Sadetes i ka rënë të kujdeset për 15 fëmijë dhe 10 nga ta tashmë janë pavarësuar ose ribashkuar me familjet e tyre.
