Barcelona është njoftuar me humbjen e dytë radhazi në të gjitha garat, shkruan Sinjali Sport.
‘Blaugranasit’ kanë pësuar disfatë në shtëpi nga Cadizi me rezultat minimal 1-0.
Goli i vetëm i shënuar i ndeshjes ishte nga spanjolli Lucas Perez i cili realizoi që në fillim të pjesës së dytë, në minutën e 47-të.
Kjo humbje e Barcelonës vjen vetëm katër ditë pas humbjes ndaj Frankfurtit dhe eliminimit nga Liga e Evropës, me të dyja disfatat të ardhura në Camp Nou.
Me këtë humbje, Barcelona shuan përfundimisht gjasat për një “mrekulli” të titullit të La Ligas.
Blaugranasit gjithashtu dështojnë të shfrytëzojnë humbjen e Sevillas ndaj Real Madridi për t’u shkëputur tre pikë para andaluzianëve në vendin e dytë, ndonëse blaugranasit kanë avantazhin e golaverazhit dhe të një ndeshje në dorë.
‘Katalunasit’ qëndrojnë në pozitën e dytë me pikë të barabarta me Sevillan, nga 60, teksa Real Madridi tani është 15 pikë para si lider me 75 pikë të mbledhura, duke u afruar edhe më shumë drejt titullit.
Barcelona ndërpret kështu një ecuri të shtatë fitoreve radhazi në La Liga, teksa njofohet me humbjen e parë në kompeticion pas 15 ndeshjeve radhazi pa humbje, që kur e kishte pësuar ndaj Betisit në dhjetor nën urdhërat Ronald Koeman.
