Disa faqe të internetit në të gjithë botën ishin të martën përkohësisht jashtë funksionit.
Media të mëdha, si: BBC, Financial Times, Guardian, New York Times, Bloomberg, CNN dhe Le Monde, njoftuan se ueb-faqet e tyre nuk punonin.
Probleme raportoi edhe ueb-faqja e shitjeve online Amazon.com dhe ueb-faqja e Qeverisë britanike gov.uk.
Të gjitha prej tyre më vonë u rikthyen në funksion.
Ueb-faqet e prekura shfaqnin mesazhin: “Error 503 Service Unavailable” (Gabimi 503, shërbimi nuk është në dispozicion).
Raportet e hershme sugjeruan se ndërprerjet mund të kishin lidhje me ofruesin e shërbimeve Fastly, i cili përforcon shumë faqe të mëdha në internet.
Fastly tha se është duke hetuar problemin me rrjetin global të shpërndarjes së përmbajtjes.