Operacioni policor kundër fajdes i zhvilluar më 2 mars në disa qytete të vendit, nga Prokuroria Themelore në Ferizaj, në koordinim me Drejtorinë për Hetimin e Krimeve të Rënda rezultoi me arrestimin e 14 personave të dyshuar për përfshirje në veprimtari kriminale. Pronarët e auto salloneve e kompanive të tjera, që u arrestuan po dyshohen për fajde, detyrim e shmangie nga tatimi. Gjatë këtij aksioni, u konfiskuan mbi 20 vetura, rreth 84 mijë euro, armë e prova të tjera, raporton Gazeta Sinjali.
Gazeta Sinjali ka siguruar detaje ekskluzive nga dosja e Prokurorisë me dyshimet e ngritura si rezultat i hetimeve që janë zhvilluar tash e një kohë.
Në vazhdën e raportimit lidhur me këtë rast, Sinjali sot sjellë detaje edhe për një biznes tjetër që u godit nga shteti, auto sallonin “Buna M” në Vushtrri, pronari i të cilit është Ajvaz Muzaqi, që tashmë ndodhet në paraburgim. Ai po dyshohet se ka kryer veprat penale “Fajde”, “Detyrim” dhe “Shmangie nga tatimi”.
Muzaqi bashkë me të dyshuarin Ardi Saraqi, dyshohen se nga viti 2020, e kanë shfrytëzuar gjendjen e vështirë financiare pronarit të ndërmarrjes ndërtimore “Ornela”, duke kontraktuar shuma joproporcionale të pasurisë.
Sipas dosjes së Prokurorisë, i dëmtuar është detyruar të paguajë shuma të parave deri në 461 mijë euro për të blerë disa vetura, të cilat më pas është detyruar t’i shes, duke pësuar dëm në vlerë të mijëra eurove.
Muzaqi dhe Saraqi dyshohen se kanë kontraktuar shuma jo proporcionale të pasurisë, në këmbim të shërbimit për personin tjetër, duke shfrytëzuar gjendjen e vështirë financiare të të dëmtuarit S.B. Ky i fundit, si pronar i ndërmarrjes ndërtimore Ornela, për shkak të vështirësive financiare, si pasojë e pandemisë dhe obligimeve nga pagesat e fajdeve për personat e tjerë, në pamundësi për t’i paguar këto obligime, është detyruar që të blejë një veturë nga të dyshuarit me çmimin prej 50 mijë eurosh, e më pas është detyruar t’ia shes një personi tjetër për 28 mijë euro, duke pësuar kështu dëm 22 mijë euro.
Të njëjtin ‘trick’, ata dyshohet se e kanë aplikuar edhe me një veturë tjetër, të cilën ia kanë shitur të njëjtit pronar, të kompanisë Ornela. Sipas dosjes së Prokurorisë, bëhet fjalë për një veturë “Audi”, që i dëmtuari është detyruar ta blejë nga të dyshuarit për çmimin prej 60 mijë eurosh dhe për shkak të obligimeve për ta paguar fajdet, është detyruar që atë veturë ta shes për 42 mijë euro.
Dëmi kap vlerën mbi 100 mijë euro
Në dosjen e siguruar nga Sinjali thuhet se i dëmtuari dyshohet se është detyruar nga Muzaqi dhe Saraqi që të blejë disa vetura në vlerë të 461 mijë eurosh, që t’i paguajë për 3 ose 4 muaj, e të cilat kanë pasur vlerë më të ulët se sa janë shitur nga të dyshuarit. Ato vetura, i dëmtuari është detyruar t’i shes për 350 mijë euro, duke pësuar kështu dëm rreth 111 mijë eurosh.
Muzaqi dhe Saraqi dyshohet se i kanë shkaktuar dëm edhe buxhetit të Republikës së Kosovës
Sipas dyshimeve të ngitura nga Prokurori i Shtetit, ata po ashtu dyshohen se në bashkëkryerje kanë kryer veprën penale “Shmangia nga tatimi”, pasi pagesën për shitblerjen e veturave e kanë bërë me para cash, duke shënuar vlera jo të sakta të mallrave të shitura, të cilat më pas i kanë përdorur për kryerjen e veprës penale “fajdeja”, duke shkaktuar kështu dëm prej mijëra eurosh në buxhetin e Republikës së Kosovës.
Muzaqi dyshohet edhe për veprën penale “Detyrimi”.
Pronari i auto sallonit “Buna M”, dyshohet edhe për një tjetër vepër penale. Nga fillimi i vitit 2020, ai dyshohet se bashkë me të dyshuarin Mujë Ademi, me qëllim të përftimit të kundërligjshëm të dobisë pasurore, me kanosje serioze, i kanë detyruar dy persona që të paguajnë shuma të parave në dëm të pasurisë së tyre. Ata po dyshohen që i kanë kanosur seriozisht viktimat se do ta pësojnë keq, ose do t’i vrasin, pasi ata nuk arrinin që t’i kthenin me kohë shumën e parave në emër të fajdes dhe shumën që e kanë marrë në shërbim.
Kështu, të dëmtuarit janë detyruar që të marrin para me fajde te personat e tjerë, me qëllim që t’i kryejnë pagesat ndaj tyre, duke shkaktuar kështu dëm nga 20 mijë deri në 100 mijë euro.
Ndryshe, edhe në ARBK, Muzaqi rezulton të jetë pronar i këtij auto salloni.
Kush janë të arrestuarit e tjerë gjatë këtij aksioni?
Listën me emrat e personave të arrestuar, nën dyshimin se kanë kryer tri vepra penale, Sinjali e ka publikuar ekskluzivisht ditën e aksionit.
Gazeta Sinjali në vijim do të publikojë edhe detaje tjera nga kërkesa e Prokurorisë për të arrestuarit gjatë aksionit policor që rrodhi nga hetimet e rastit ‘Brezovica’.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.