Një rast i rëndë ka ndodhur sot rreth orës 12:35 në rrugën ‘Brigada 123’ në komunën e Suharekës, ku një kioskë është përfshirë nga flakët, raporton Gazeta Sinjali.
Sinjali mëson se dyshohet që zjarri ka shpërthyer si pasojë e rrymës elektrike, me ç’rast lëndime ka pësuar një vajzë e vogël 11-vjeçare.
11-vjeçarja si pasojë e lëndimeve të marra në krah, është dërguar me urgjencë në Emergjencën e Suharekës, por që gjendja e saj është stabile dhe jashtë rrezikut për jetë.
Rasti është denoncuar në Polici, ku zyrtarë policorë bashkë me njësitet e KEDS-it dhe zjarrfikësit kanë dalë në vendin e ngjarjes, ku edhe është lokalizuar dhe është bërë fikja e zjarrit.
Sipas burimeve të Gazetës Sinjali, dëmi i shkaktuar nga zjarri është rreth 7 mijë euro.