Gazeta Sinjali më 17 maj raportoi për një rast të dhunës në familje në fshatin Nadakovc të Vushtrrisë, ku viktimë ishte një grua e cila përjetoi dhunë fizike e psikike nga bashkëshorti i saj. Në ndihmë asaj i doli djali, i cili denoncoi babain në Polici dhe i dyshuari menjëherë u arrestua.
Burimet e Sinjalit brenda Prokurorisë kanë njoftuar se pas përfundimit të periudhës së ndalimit policor, gjatë ditës së djeshme, i dyshuari ka dalë para gjyqtarit të procedurës paraprake, me ç’rast është marrë vendimi për kërkesën e Prokurorisë.
Ndaj të dyshuarit S.A., Gjykata ka marrë vendim që të caktohet masa e paraburgimit, në kohëzgjatje prej 1 muaji, duke e ngarkuar me veprën penale “dhunë në familje”.
Detajet e rastit
Sinjali mëson se këtë herë rasti është raportuar në Polici nga djali i viktimës, i cili e ka denoncuar babain për presionin dhe dhunën që po ia shkakton nënës së tij.
Burri nga Vushtrria dyshohet se në vazhdimësi ka shkaktuar dhunë fizike dhe psikike bashkëshortes së tij. I shqetësuar për problemet e familjes, djali i çiftit ka vendosur që zgjidhja më e mirë është raportimi i rastit në stacion policor, ku ka kërkuar ndihmë nga Policia.
Pas denoncimit të rastit, Policia ka prangosur burrin e dyshuar, ndaj të cilit Prokurori i Shtetit ka urdhëruar ndalimin për 48 orë, për veprën penale “dhunë në familje”.
Ndërsa viktima, siç mëson Sinjali është dërguar për kontroll mjekësor dhe më pas është kthyer në shtëpinë e saj.