Vetëm në 24 orët e fundit, katër femra janë ankuar në Policinë e Kosovës se janë keqtrajtuar e sulmuar fizikisht nga bashkëshortët e tyre, raporton Gazeta Sinjali.
Burime të Gazetës Sinjali brenda Policisë së Kosovës kanë bërë të ditur se një femër egjiptiane ka njoftuar se burri i saj i dyshuar mashkull po ashtu egjiptian e ka sulmuar fizikisht dhe psiqikisht. Viktima ka refuzuar tretman, kurse i dyshuari është dërguar në repartin psikiatrik.
Rasti tjetër është raportuar në stacionin e policisë në Mitrovicë, ku një femër është ankuar se pas një mosmarrëveshje, bashkëshorti i saj ka ushtruar dhunë psiqike ndaj saj.
Ndërsa një rast tjetër ka ndodhur në fshatin Labushë të Deçanit ku një i dyshuar mashkull me të cilin ishte në lidhje e ka sulmuar fizikisht dhe e ka kanosur në vazhdimësi.
Rasti i fundit i dhunës që është raportuar ka ndodhur në fshatin Sibofcë të Podujevës. Një grua është ankuar se pas një mosmarrëveshje, bashkëshorti i saj e ka sulmuar fizikisht.
Këto raste janë raportuar në polici, por sipas statistikave të nxjerra nga organizata për të drejtat e grave ka edhe shumë të tilla që nuk raportohen fare në polici.
