Zëvendësministri i Financave në Qeverinë e Kosovës, Agim Krasniqi, duke folur në lidhje me buxhetin e vitit 2021, ka thënë se nga 660 milionë euro shpenzime kapitale të buxhetit, 204 milionë prej tyre janë vetëm për Ministrinë e Infrastrukturës.
“Diku rreth 625 milionë euro janë pagat e rregullta dhe këto nuk mund t’i zvogëlojmë. Mbi 640 milionë euro janë skema sociale, subvencionet. I kemi zvogëluar mallrat dhe shërbimet nga 355 milionë në 310 milionë euro. I kemi rreth 616 milionë shpenzime kapitale, prej 204 milionë janë te Ministria e Infrastrukturës dhe prej këtij 204 milionë janë 200 milionë euro të cilat kanë kontrata, janë obligime ligjore që ne nuk kemi mujt me i zvogëlu. Janë projekte të filluara kryesisht në vitin 2019”, ka thënë Krasniqi.
Sipas tij, buxheti për vitin 2021, për shpenzime, është 2.6 miliardë euro, ndërsa të hyrat janë 1 miliard e 788 milionë euro.
“Dallimi në mes të shpenzimeve dhe të hyrave është se ne e kemi rritë deficitin buxhetor prej 2 në 6.5% dhe e kemi zvogëlu prej 4.5% në 3% bilancin bankar. Dhe këto dallim kanë bërë që shpenzimet dhe të hyrat e rregullta buxhetore të jetë shumë i madh”, ka deklaruar Krasniqi në debatin e Kallxo.com.
“Projeksioni i Ministrisë për buxhetin këtë vit ka qenë pa autostradë, pastaj në Qeveri i është shtuar edhe autostrada me 200 mijë euro”, shtoi ai.