Qytetarët po ankohen se shoferët e autobusëve të trafikut urban në Prishtinë po e devijojnë linjën e udhëtimit, duke i detyruar qytetarët që të zbresin në një stacion tjetër larg destinacionit të tyre, shkruan Gazeta Sinjali.
Sipas një sinjalizuesi i cili ka qenë dëshmitar okular, një rast i tillë ka ndodhur sot në autobusin e linjës 3 në Prishtinë.
Sipas sinjalizuesit, shoferi ka kërkuar që të gjithë udhëtarët të zbresin te rrethi, në fillim të rrugës “Muharrem Fejza”, në lagjen Mati 1. Por, një udhëtare ka kundërshtuar ashpër, duke i kërkuar shoferit ta vazhdojë linjën e rregullt dhe duke i lutur udhëtarët e tjerë që të mos zbresin nga autobusi.
Tutje, sinjalizuesi pohon se kjo nuk është hera e parë që shoferët e trafikut urban detyrojnë qytetarët që të zbresin nga autobusi, me qëllim që ta devijojnë linjën e rregullt, ndërsa shton se udhëtarët thonë se shoferët nuk u japin asnjë arsye se pse duhet të zbresin në një stacion tjetër.