Presidenti serb, Aleksandar Vuçiq, ka thënë se Prishtina nuk po bën asgjë për të gjetur një zgjidhje kompromisi me Serbinë. Ai ka theksuar se ideja e korrigjimit të kufirit, ose shkëmbimi i territoreve më nuk është aktuale.

Këto komente, Vuçiq i ka dhënë për gazetën franceze “Le Figaro”, madje ai se ka lënë pa e përmendur edhe taksën 100% ndaj produkteve serbe.

“Prishtina ka vendosur të aplikojë taksë prej 100 për qind për produktet nga Serbia për të na detyruar të njohim pavarësinë e pakushtëzuar të Kosovës. Kjo nuk është sjellje e civilizuar. Nëse ata që janë përgjegjës në Kosovë mendojnë se shantazhet e tyre të vazhdueshme mund të japin rezultate, por janë të gabuar. Ne nënshkruam prillin e  vitit 2013 në Bruksel një marrëveshje për të garantuar formimin e Asociacionit të Komunave Serbe. Ata nuk e zbatuan, dhe në vend të kësaj ata sajojnë  të pavërteta për ta dëmtuar imazhin tonë”, ka thënë Vuçiq.

Vuçiç ndër të tjera tha se e vlerëson që presidenti francez Emmanuel Macron po bën përpjekjet personale për diçka që askush nuk mund të garantojë sukses. /Gazeta Sinjali/