image Ambasadori amerikan në Serbi: Më tepër ka mundësi për përparim në dialog sesa për konflikt

Politikë

Ambasadori amerikan në Serbi: Më tepër ka mundësi për përparim në dialog sesa për konflikt

news image

Ambasadori amerikan në Beograd, Christopher Hill ka deklaruar sot se përfaqësuesit e Beogradit dhe Prishtinës duhet të bëjnë më shumë në zgjidhjen e çështjeve të diskutueshme, duke shtuar se ka më shumë mundësi për përparim real në dialog sesa për një konflikt të ri.

Duke iu përgjigjur pyetjeve të qytetarëve në rrjete sociale rreth dialogut dhe rrezikut të konfliktit, ambasadori amerikan tha se është e qartë se Beogradi dhe Prishtina duhet të bëjnë më shumë në zgjidhjen e çështjeve të diskutueshme.

Përfaqësuesit e Beogradit dhe Prishtinës kanë ndërmjetësues mjaft të mirë nga BE-ja dhe SHBA-të janë gjithashtu shumë aktive. Mezi pres të shoh një përparim, dhe mendoj se të gjithë mund të shtyjmë për këtë dhe të sigurohemi që të gjithë të jenë në detyrë dhe të shohin përpara”, thekson Hill.

Rundi i ri i dialogut mes Kosovës dhe Serbisë, që ndërmjetësohet nga Bashkimi Evropian, do të mbahet më 18 gusht në Bruksel.

Duke komentuar faktin se Serbia është i vetmi vend evropian që nuk dëshiron të vendosë sanksione ndaj Rusisë, Hill tha se është e qartë se Serbia ka një qëndrim ndryshe nga SHBA-ja dhe partnerët e saj evropianë.

“Mendoj se është e rëndësishme të përqendrohemi në gjërat për të cilat biem dakord dhe të përpiqemi të ecim përpara së bashku”, tha Hill, raporton televizioni publik.

Ndërkaq, i pyetur se pse SHBA e mbështet integritetin e Ukrainës, por jo të Serbisë, Hill tha se situata në Ukrainë është krejtësisht e ndryshme dhe e pakrahasueshme me Kosovën.

“Në fund të ditës, ky është një fqinj që sulmoi Ukrainën, civilët e saj dhe vazhdon të bombardojë qytetet e saj. Ukraina me të vërtetë duhej të luftonte kundër atij sulmi absolutisht keqdashës nga Rusia, i cili vazhdon edhe sot”, tha Hill.

/GazetaSinjali/